រដ្ឋបាលស្រុកទ្រាំង ប្រារព្ធពិធីបុណ្យកាន់បិណ្ឌនៅវត្តស្វាយអណ្ដែត (វត្តក្រាំងកណ្ដាល) ឃុំប្រាំបីមុំ

​ស្រុកទ្រាំង៖ នៅថ្ងៃចន្ទ ទី០៥ ខែតុលា ឆ្នាំ២០២៦ នេះ លោក អ៊ុំ ចំរើន អភិបាល នៃគណៈអភិបាលស្រុកទ្រាំង បានអញ្ជើញដឹកនាំសហការី ចូលរួមក្នុងពិធីបុណ្យកាន់បិណ្ឌ របស់រដ្ឋបាលស្រុកទ្រាំង នៅវត្តស្វាយអណ្ដែត (ហៅវត្តក្រាំងកណ្ដាល) ស្ថិតក្នុងឃុំប្រាំបីមុំ ស្រុកទ្រាំង ខេត្តតាកែវ។
​ពិធីនេះក៏មានការអញ្ជើញចូលរួមពីសំណាក់ លោក លោកស្រី ជាអភិបាលរងស្រុក ព្រមទាំងមន្ត្រីរាជការ និងកងកម្លាំងប្រដាប់អាវុធចំណុះឱ្យរដ្ឋបាលស្រុកទ្រាំងផងដែរ។
នាឪកាសនោះលោក អភិបាលស្រុក បានមាន​ប្រសាសន៍ថាការចូលរួមប្រារព្ធពិធីបុណ្យកាន់បិណ្ឌនេះ ធ្វើឡើងក្នុងគោលបំណងដើម្បីទ្រទ្រង់ និងលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋ ព្រមទាំងដើម្បីឧទ្ទិសកុសលផលបុណ្យជូនដល់បុព្វការីជន ជីដូនជីតា និងញាតិសន្តានទាំងប្រាំពីរដែលបានចែកឋានទៅកាន់លោកខាងមុខ ឱ្យបានទៅកាន់សុគតិភព ព្រមទាំងបួងសួងសុំសេចក្តីសុខ សេចក្តីចម្រើន ជូនដល់ថ្នាក់ដឹកនាំ មន្ត្រីរាជការ និងប្រជាពលរដ្ឋទូទាំងស្រុកទ្រាំងទាំងមូល។