លោកឧត្តមសេនីយ៍ទោ ម៉ែន លី ដឹកនាំកម្លាំងនគរបាលខេត្តតាកែវ ចូលរួមពិធីកាន់បិណ្ឌទី៨ នៅវត្តមង្គលមានលក្ខណ៍ ស្រុកត្រាំកក់

តាកែវ៖ នារសៀលថ្ងៃអាទិត្យ ទី០៤ ខែតុលា ឆ្នាំ២០២៦ លោកឧត្តមសេនីយ៍ទោ ម៉ែន លី ស្នងការនៃស្នងការដ្ឋាននគរបាលខេត្តតាកែវ បានអញ្ជើញដឹកនាំមន្ត្រីនគរបាលក្រោមឱវាទ ចូលរួមយ៉ាងច្រើនកុះករក្នុងពិធីសូត្រមន្ត វេរភត្តាហារ និងប្រគេនបច្ច័យបង្សុកូលថ្វាយព្រះសង្ឃ ដើម្បីបញ្ចប់វេនកាន់បិណ្ឌទី៨ នៃពិធីបុណ្យភ្ជុំបិណ្ឌ ដែលជាបុណ្យប្រពៃណីជាតិខ្មែរ។

ពិធីបុណ្យបែបសាសនានេះ ត្រូវបានប្រារព្ធឡើងដោយទឹកចិត្តសទ្ធាជ្រះថ្លាយ៉ាងជ្រាលជ្រៅ ស្ថិតនៅវត្តមង្គលមានលក្ខណ៍ ក្នុងភូមិត្រពាំងស្វាយ ឃុំត្រពាំងធំខាងជើង ស្រុកត្រាំកក់ ខេត្តតាកែវ។

ការចូលរួមប្រារព្ធពិធីនេះ ធ្វើឡើងក្នុងគោលបំណងឧទ្ទិសកុសលផលបុណ្យ ជូនដល់បុព្វការីជន អាណាព្យាបាល និងញាតិសន្តានទាំងប្រាំពីរសន្ដាន ដែលបានចែកឋានទៅកាន់លោកខាងមុខ ព្រមទាំងរួមគ្នាបួងសួងសុំសេចក្តីសុខ សេចក្តីចម្រើន សុវត្ថិភាព និងវិបុលសុខ ជូនដល់ថ្នាក់ដឹកនាំ កងកម្លាំងនគរបាលជាតិគ្រប់លំដាប់ថ្នាក់ និងបងប្អូនប្រជាពលរដ្ឋទាំងអស់នៅក្នុងផ្ទៃប្រទេស។