ស្នងការនគរបាលខេត្តតាកែវ ដឹកនាំកងកម្លាំងចូលរួមកាន់បិណ្ឌវេនទី៣ នៅវត្តចំនួន៣ ដើមី្បលើកស្ទួយព្រះពុទ្ធសាសនា និងឧទ្ទិសកុសលជូនបុព្វការីជន

ខេត្តតាកែវ៖ នាថ្ងៃទី២៩ ខែកញ្ញា ឆ្នាំ២០២៦ ត្រូវនឹងថ្ងៃកាន់បិណ្ឌវេនទី៣ លោកឧត្តមសេនីយ៍ទោ ម៉ែន លី ស្នងការនៃស្នងការដ្ឋាននគរបាលខេត្តតាកែវ បានដឹកនាំកងកម្លាំងនគរបាលក្រោមឱវាទ ចូលរួមធ្វើបុណ្យកាន់បិណ្ឌយ៉ាងកកកុញ នៅតាមទីអារាមចំនួន៣ ក្នងស្រុកគិរីវង់ និងស្រុកត្រាំកក់ ខេត្តតាកែវ។

ការអញ្ជើញចូលរួមក្នុងពិធីបុណ្យកាន់បិណ្ឌនេះ ធ្វើឡើងក្នុងគោលបំណងលើកស្ទួយ និងទ្រទ្រង់ព្រះពុទ្ធសាសនា ដែលជាសាសនារបស់រដ្ឋ ព្រមទាំងដើម្បីសម្ដែងនូវកតញ្ញូកតវេទិតាធម៌ ឧទ្ទិសនូវមហាកុសលផលបុណ្យ ជូនចំពោះវិញ្ញាណក្ខន្ធបុព្វការីជន មានមាតាបិតា ជីដូនជីតា និងយុទ្ធជនយុទ្ធនារី ដែលបានលាចាកលោកទៅកាន់បរលោកខាងមុខ។

ក្នុងឱកាសដ៏ប្រពៃថ្លៃថ្លានេះដែរ លោកស្នងការ ព្រមទាំងកងកម្លាំងនគរបាលទាំងអស់ ក៏បានតាំងចិត្តជ្រះថ្លាបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោក សូមជួយតាមបីបាច់ថែរក្សា បព្វជិត និងពុទ្ធបរិស័ទ ជាពិសេសកងកម្លាំងនគរបាលទាំងអស់ ឲ្យជួបប្រទះតែសេចក្តីសុខ សេចក្តីចម្រើន វិបុលសុខ និងមានកម្លាំងមាំមួនក្នុងការបំពេញភារកិច្ច ការពារសន្តិសុខ សុវត្ថិភាព ជូនប្រជាពលរដ្ឋ និងសង្គមជាតិទាំងមូល។