អាជ្ញាធរស្រុកត្រាំកក់ សហការជាមួយមន្ទីរជំនាញ ចុះកាយបើកមុខទឹកលើផ្លូវខេត្តលេខ ១៣២ ដើម្បីរំដោះទឹក និងការពារហេដ្ឋារចនាសម្ព័ន្ធ

តាកែវ៖នៅថ្ងៃទី២៥ ខែកញ្ញា ឆ្នាំ២០២៦ ក្រុមការងារ នៃមន្ទីរសាធារណការ និងដឹកជញ្ជូនខេត្តតាកែវ បានសហការជាមួយអាជ្ញាធរមូលដ្ឋានស្រុកត្រាំកក់ ចុះប្រតិបត្តិការកាយបើកមុខទឹក និងប្រព័ន្ធរំដោះទឹកនៅលើកំណាត់ផ្លូវខេត្តលេខ ១៣២ ដើម្បីរំដោះជំនន់ទឹកភ្លៀងដែលបានហក់ឡើងមកប្រៀបចិញ្ចើមផ្លូវ ។
សកម្មភាពចុះអន្តរាគមន៍ផ្ទាល់ដីនេះ ត្រូវបានដឹកនាំបញ្ជាដោយលោក ហ៊ត មនោ អភិបាលនៃគណៈអភិបាលស្រុកត្រាំកក់ លើភូមិសាស្ត្រកំណាត់ផ្លូវខេត្តលេខ ១៣២ ចន្លោះគីឡូម៉ែត្រលេខ ៨+០០០ ដល់ គីឡូម៉ែត្រលេខ ៩+០០០។
ការកាយបើកមុខទឹក និងស្ដារប្រឡាយរំដោះទឹកនេះ គឺដើម្បីពន្លឿនការហូរធ្លាក់នៃទឹកជំនន់ភ្លៀង កាត់បន្ថយការលិចលង់ និងការពារកុំឲ្យទឹកហូរច្រោះខូចខាតចិញ្ចើមផ្លូវ ឬប៉ះពាល់ដល់គុណ ភាពគ្រឹះផ្លូវខេត្តមួយខ្សែនេះ។មួយវិញទៀត ដើម្បីធានាបាននូវការធ្វើដំណើរឆ្លងកាត់របស់បងប្អូនប្រជាពលរដ្ឋឲ្យមានសុវត្ថិភាព និងសម្រួលដល់ការដឹកជញ្ជូនក្នុងតំបន់ផងដែរ ។
ក្នុងឱកាសនោះ អាជ្ញាធរស្រុក ក៏បានអំពាវនាវដល់បងប្អូនប្រជាពលរដ្ឋដែលរស់នៅអមសងខាងផ្លូវ ចូលរួមសហការជួយថែរក្សាប្រព័ន្ធរំដោះទឹក និងចៀសវាងការចាក់ដី ឬចោលសំរាមបិទភ្ជិតមុខលូ ដែលអាចបណ្ដាលឲ្យមានការកកស្ទះផ្លូវទឹកនៅថ្ងៃខាងមុខ៕