រដ្ឋបាលខេត្តតាកែវ ស្នើទៅក្រសួងសាធារណការ ស្ថាបនាផ្លូវកៅស៊ូ DBST ប្រវែងជិត ៣គីឡូម៉ែត្រ នៅស្រុកសំរោង ដើម្បីសម្រួលការធ្វើដំណើរជូនប្រជាពលរដ្ឋ

ខេត្តតាកែវ៖ ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានដាក់សំណើស្នើសុំជាបន្ទាន់ទៅកាន់ ក្រសួងសាធារណការ និងដឹកជញ្ជូន ដើម្បីស្ថាបនាផ្លូវខ្នងទំនប់ត្នោតទេរ ឱ្យទៅជាប្រភេទផ្លូវកៅស៊ូ DBST ដែលមានប្រវែងជិត ៣.០០០ម៉ែត្រ ដើម្បីទុកជាកាដូ និងជាចំណងដៃជូនដល់បងប្អូនប្រជាពលរដ្ឋ ក្នុងការសម្រួលដល់ការធ្វើដំណើរ និងការដឹកជញ្ជូនឱ្យកាន់តែមានភាពងាយស្រួលជាងមុន។

យោងតាមការបញ្ជាក់ពី លោក ណុប នី ប្រធានមន្ទីរសាធារណការ និងដឹកជញ្ជូនខេត្តតាកែវ បានឱ្យដឹងនៅព្រឹកថ្ងៃព្រហស្បតិ៍ ទី២៤ ខែកញ្ញា ឆ្នាំ២០២៦ នេះថា គម្រោងស្ថាបនាផ្លូវកៅស៊ូ DBST លើខ្នងទំនប់ត្នោតទេរនេះ មានទីតាំងស្ថិតនៅក្នុងភូមិសាស្ត្រ ឃុំលំចង់ និងឃុំទ្រា ស្រុកសំរោង ខេត្តតាកែវ។

ការស្នើសុំស្ថាបនាផ្លូវមួយខ្សែនេះ រធ្វើឡើងក្រោមការយកចិត្តទុកដាក់ខ្ពស់ពី ឯកឧត្តម អភិបាលខេត្តតាកែវ ក្នុងការឆ្លើយតបទៅនឹងតម្រូវការចាំបាច់របស់ប្រជាពលរដ្ឋក្នុងមូលដ្ឋាន ដើម្បីលើកកម្ពស់ហេដ្ឋារចនាសម្ព័ន្ធផ្លូវថ្នល់ សម្រួលដល់ការធ្វើដំណើរឆ្លងកាត់ និងការដឹកជញ្ជូនកសិផលផ្សេងៗឱ្យបានឆាប់រហ័ស និងមានសុវត្ថិភាព៕