អភិបាលស្រុកបាទី ដឹកនាំកិច្ចប្រជុំបិទបញ្ចប់គម្រោងសាងសង់ផ្លូវបេតុងអាមេ ប្រវែង ១,១៨០ម៉ែត្រ នៅឃុំក្រាំងលាវ

នៅព្រឹកថ្ងៃទី២៣ ខែកញ្ញា ឆ្នាំ២០២៦ លោក សាយ វណ្ណៈ អភិបាលនៃគណៈអភិបាលស្រុកបាទី បានដឹកនាំកិច្ចប្រជុំបិទបញ្ចប់ការងារគម្រោងសាងសង់ផ្លូវបេតុងអាមេ ប្រវែង ១,១៨០ម៉ែត្រ ស្ថិតនៅភូមិព្រហូត និងភូមិត្រពាំងពោធិ ឃុំក្រាំងលាវ ដែលជាគម្រោងមូលនិធិស្រុក ឆ្នាំ២០២៦។

កិច្ចប្រជុំនេះ មានការចូលរួមពីតំណាងមន្ទីរសេដ្ឋកិច្ច និងហិរញ្ញវត្ថុខេត្តតាកែវ គណៈកម្មការលទ្ធកម្មស្រុក អាជ្ញាធរឃុំក្រាំងលាវ លោកមេភូមិ ចាស់ព្រឹទ្ធាចារ្យ ប្រជាពលរដ្ឋ និងក្រុមហ៊ុនអនុវត្តគម្រោង។

ក្នុងឱកាសនេះ លោកអភិបាលបានណែនាំដល់អាជ្ញាធរ និងប្រជាពលរដ្ឋ ត្រូវរួមគ្នាថែរក្សា ការពារ និងប្រើប្រាស់ផ្លូវនេះឱ្យបានត្រឹមត្រូវ ជៀសវាងការចាក់ដី ឬសាងសង់លំនៅឋានខ្ពស់ជាងកម្ពស់ផ្លូវ ដែលអាចបង្កការកកស្ទះទឹក និងធ្វើឱ្យផ្លូវឆាប់ខូចខាត។

លោកអភិបាលបានបញ្ជាក់ថា ផ្លូវនេះជាទ្រព្យសម្បត្តិសាធារណៈ និងជាផលប្រយោជន៍រួមរបស់ប្រជាពលរដ្ឋ ដូច្នេះគ្រប់ភាគីត្រូវចូលរួមថែរក្សាឱ្យបានគង់វង្ស និងប្រើប្រាស់បានយូរអង្វែង។

ជាមួយគ្នានេះ រដ្ឋបាលស្រុកបាទី បានប្រគល់ផ្លូវនេះជូន រដ្ឋបាលឃុំក្រាំងលាវ ទទួលខុសត្រូវថែរក្សា និងការពារបន្ត។