អភិបាលរងក្រុងដូនកែវ ដឹកនាំមន្ត្រីជំនាញចុះពិនិត្យតូបអាជីវករ ស្នើសុំការអនុញ្ញាតប្រក់ដំបូលនៅផ្សារធំតាកែវ

តាកែវ៖ នារសៀលថ្ងៃទី១៦ ខែកញ្ញា ឆ្នាំ២០២៦ លោក សុខ គង្គារ័ត្ន អភិបាលរង នៃគណៈអភិបាលក្រុងដូនកែវ បានដឹកនាំមន្ត្រីជំនាញ និងតំណាងក្រុមហ៊ុនវិនិយោគផ្សារធំតាកែវ ចុះពិនិត្យស្ថានភាពតូបអាជីវករមួយចំនួន ដែលបានស្នើសុំការអនុញ្ញាតប្រក់ដំបូលនៅក្នុងបរិវេណផ្សារ។
ការចុះពិនិត្យនេះធ្វើឡើង ដើម្បីពិនិត្យស្ថានភាពជាក់ស្តែងនៅតាមតូបនីមួយៗ ព្រមទាំងពិភាក្សា និងសម្របសម្រួលដោះស្រាយសំណើរបស់អាជីវករ ឱ្យស្របតាមលក្ខខណ្ឌ និងស្ថានភាពជាក់ស្តែង។
ក្នុងឱកាសនោះ ក្រុមការងារបានពិនិត្យលើទីតាំង និងស្ថានភាពតូបអាជីវករ ព្រមទាំងស្តាប់សំណូមពរ និងបញ្ហាប្រឈមរបស់អាជីវករពាក់ព័ន្ធនឹងការប្រក់ដំបូល ដើម្បីស្វែងរកដំណោះស្រាយដែលមានលក្ខណៈសមស្រប និងអាចអនុវត្តបាន។
លោក សុខ គង្គារ័ត្ន បានបញ្ជាក់ថា ការចុះពិនិត្យ និងសម្របសម្រួលនេះ មានគោលបំណងធានាឱ្យការប្រកបអាជីវកម្មរបស់ប្រជាពលរដ្ឋអាចប្រព្រឹត្តទៅបានសមស្រប ស្របពេលជាមួយគ្នានេះ ក៏ត្រូវរក្សាសណ្ដាប់ធ្នាប់ អនាម័យ សោភ័ណភាព និងសុវត្ថិភាពនៅក្នុងបរិវេណផ្សារផងដែរ។
ជាមួយគ្នានេះ ក្រុមការងារបានបន្តជំរុញឱ្យមានការសហការរវាងអាជីវករ ក្រុមហ៊ុនវិនិយោគ និងអាជ្ញាធរមូលដ្ឋាន ដើម្បីរួមគ្នាដោះស្រាយបញ្ហានានា និងរៀបចំបរិវេណផ្សារឱ្យមានសណ្ដាប់ធ្នាប់ ស្អាត មានសុវត្ថិភាព និងបង្កលក្ខណៈងាយស្រួលដល់ប្រជាពលរដ្ឋក្នុងការចេញចូល និងប្រកបអាជីវកម្ម៕