លោកអភិបាលក្រុងដូនកែវ ចុះរំលែកទុក្ខ និងនាំយកថវិកាឧបត្ថម្ភជូនគ្រួសារសពឪពុកវីរជនកងទ័ព នៅសង្កាត់រកាក្រៅ

ក្រុងដូនកែវ៖ កាលពីព្រឹកថ្ងៃទី១១ ខែកញ្ញា ឆ្នាំ២០២៦ លោក ឌឹម គឹមសាន អភិបាល នៃគណៈអភិបាលក្រុងដូនកែវ អមដំណើរដោយសហការី បានអញ្ជើញចុះសួរសុខទុក្ខ និងចូលរួមរំលែកទុក្ខយ៉ាងក្រៀមក្រំជាមួយគ្រួសារសព ឪពុករបស់លោក ថេង មករា ដែលជាវីរជនកងទ័ពកំពុងឈរជើងបំពេញភារកិច្ចការពារជាតិនៅទិសបឹងត្រកួន។

ពិធីបុណ្យសពនេះត្រូវបានរៀបចំឡើងស្ថិតនៅភូមិព្រេច សង្កាត់រកាក្រៅ ក្រុងដូនកែវ ខេត្តតាកែវ បន្ទាប់ពីឪពុករបស់វីរជនកងទ័ពបានទទួលមរណភាព កាលពីថ្ងៃទី១០ ខែកញ្ញា ឆ្នាំ២០២៦ កន្លងទៅ។ ក្នុងឱកាសដ៏ក្រៀមក្រំនោះ លោកអភិបាលក្រុង ព្រមទាំងសហការីអមដំណើរ បាននាំយកថវិកា និងគ្រឿងឧបភោគបរិភោគមួយចំនួន ចូលរួមឧបត្ថម្ភដល់គ្រួសារសព ដើម្បីជួយសម្រាលបន្ទុកក្នុងពិធីបុណ្យ។

ជាមួយគ្នានេះ លោកអភិបាលក៏បានពាំនាំនូវសាររំលែកទុក្ខយ៉ាងជ្រាលជ្រៅ និងការសោកស្តាយជាពន់ពេកជាមួយគ្រួសារនៃសព ចំពោះការបាត់បង់លោកឪពុកដែលជាការបាត់បង់សសរទ្រូងដ៏សំខាន់ក្នុងគ្រួសារ និងបានបួងសួងសូមឱ្យវិញ្ញាណក្ខន្ធរបស់សព បានទៅកាន់សុគតិភព កុំបីឃ្លៀងឃ្លាតឡើយ៕