ផ្ទុះការរិះគន់ផ្អើលបណ្តាញសង្គម ! រឿង កម្លាំងនគរបាលស្រុកចុងកាល ផឹកស៊ីស្រវឹងទាស់ទែងគ្នា រហូតឈានដល់ការប្រើអំពើហិង្សាក្នុងអធិការដ្ឋាន

ខេត្តឧត្តរមានជ័យ៖ មហាជននៅលើបណ្តាញសង្គមបានសម្តែងការរិះគន់យ៉ាងចាស់ដៃ បន្ទាប់ពីមានការលេចធ្លាយវីដេអូឃ្លីបមួយ បង្ហាញពីសកម្មភាពក្រុមកងកម្លាំងនគរបាលមួយក្រុម ជួបជុំគ្នាផឹកស៊ីរហូតស្រវឹងជោគជាំ និងបានបង្កជម្លោះវាយតប់គ្នាយ៉ាងអនាធិបតេយ្យ នៅក្នុងបរិវេណអធិការដ្ឋាននគរបាលស្រុកចុងកាល បង្កឱ្យមានការភ្ញាក់ផ្អើលដល់ប្រជាពលរដ្ឋទាំងកណ្តាលអាធ្រាត្រ។

យោងតាមវីដេអូឃ្លីបខ្លីមានប្រវែងប្រមាណ ៣០វិនាទី ដែលអង្គភាពសារព័ត៌មានយើងទទួលបាននៅព្រឹកថ្ងៃទី០៩ ខែមិថុនា ឆ្នាំ២០២៦ នេះ បានបង្ហាញឱ្យឃើញពីសកម្មភាពបុគ្គលមួយក្រុម ដែលសុទ្ធសឹងជាមន្ត្រីនគរបាលជាតិ។ ក្នុងនោះដែរ ផ្អែកតាមប្រភពព័ត៌មានខ្លះបានខ្សឹបប្រាប់ថា ក្នុងចំណោមអ្នកទាំងនោះ ក៏មានមន្ត្រីមានឋានៈជាអធិការរងស្រុកផងដែរ។ ប៉ុន្តែផ្ទុយទៅវិញ ពួកគាត់បែរជានាំគ្នាជួបជុំសេពគ្រឿងស្រវឹងនៅក្នុងបរិវេណអង្គភាពការងាររហូតដល់យប់ជ្រៅ ហើយក៏បានទាស់ទែងខ្វែងគំនិតគ្នា រហូតឈានដល់ការប្រើហិង្សាដាក់គ្នាទៅវិញទៅមកទាំងកណ្តាលអាធ្រាត្រតែម្តង។ រូបភាពអសកម្មទាំងនេះ បានរងការរិះគន់យ៉ាងខ្លាំងពីសំណាក់មជ្ឈដ្ឋានទូទៅ ដោយសារតែទង្វើរបស់មន្ត្រីនគរបាលនៃអធិការដ្ឋាននគរបាលស្រុកចុងកាលទាំងនោះ បានរំលោភបំពានយ៉ាងធ្ងន់ធ្ងរទៅលើវិន័យរបស់កងកម្លាំងនគរបាលជាតិ ព្រមទាំងធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់អង្គភាពទាំងមូល។

ជុំវិញករណីរសើបខាងលើនេះ អង្គភាពសារព័ត៌មានយើងបានព្យាយាមសុំការបំភ្លឺបន្ថែមពី លោកឧត្តមសេនីយ៍ទោ ខូវ លី ស្នងការនៃស្នងការដ្ឋាននគរបាលខេត្តឧត្តរមានជ័យ តាមរយៈប្រព័ន្ធតេឡេក្រាម (Telegram) នៅព្រឹកថ្ងៃដដែលនេះ។ ជាការឆ្លើយតប លោកស្នងការបានបញ្ជាក់យ៉ាងខ្លីថា ពាក់ព័ន្ធនឹងព័ត៌មាននៃការលេចធ្លាយវីដេអូនេះ លោកបានទទួលជ្រាបហើយ ចំណែកឯចំណាត់ការបន្ត លោកកំពុងចាត់តាំងមន្ត្រីជំនាញឱ្យចុះទៅស្រាវជ្រាវ និងពិនិត្យលើករណីនេះយ៉ាងយកចិត្តទុកដាក់ ដើម្បីមានវិធានការទៅតាមផ្លូវច្បាប់ និងវិន័យកងកម្លាំង៕