រដ្ឋបាលស្រុកបូរីជលសារ ចុះសួរសុខទុក្ខ និងនាំយកអំណោយឧបត្ថម្ភជូននិវត្តជនមានពិការភាព ក្នុងឃុំដូងខ្ពស់

តាកែវ៖ កាលពីរសៀលថ្ងៃអង្គារ ទី២១ ខែកក្កដា ឆ្នាំ២០២៦ លោក ស៊ូ ភិរម្យ អភិបាលនៃគណៈអភិបាលស្រុកបូរីជលសារ និងជាប្រធានសមាគមអតីតយុទ្ធជន និងនិវត្តជនកម្ពុជាស្រុក បានដឹកនាំប្រតិភូអញ្ជើញចុះជួបសំណេះសំណាល និងសួរសុខទុក្ខដោយផ្ទាល់ដល់ លោក ជួប បៀន ដែលជានិវត្តជនមានពិការភាព រស់នៅក្នុងភូមិតាយឹង ឃុំដូងខ្ពស់ ស្រុកបូរីជលសារ ខេត្តតាកែវ ។
មានការអញ្ជើញចូលរួមអមដំណើរពីសំណាក់ លោកអធិការនគរបាលស្រុក, លោកមេបញ្ជាការផ្នែកសឹករងស្រុក, លោកមេបញ្ជាការរងមូលដ្ឋានកងរាជអាវុធហត្ថស្រុក, លោកប្រធាន និងអនុប្រធានការិយាល័យចំណុះរដ្ឋបាលស្រុក ព្រមទាំងសមាជិកក្រុមប្រឹក្សាឃុំ និងលោកមេភូមិផងដែរ។
នាឱកាសប្រកបដោយភាពស្និទ្ធស្នាល និងកក់ក្តៅនេះ លោកអភិបាលស្រុក និងជាប្រធាន អ.ន.ក. ស្រុក បាននាំយកអំណោយជាថវិកា និងគ្រឿង ឧបភោគបរិភោគប្រគល់ជូនលោក ជួប បៀន ដើម្បីជួយសម្រាលទុក្ខធុរៈ និងជីវភាពរស់នៅប្រចាំថ្ងៃរួមមាន៖ ថវិកា ១០០ ០០០ រៀល អង្ករ ២៥ គីឡូក្រាមមី ១ កេស សម្ភារប្រើប្រាស់៖ ភួយ ១, មុង ១ និងកន្ទេល ១ ។
សកម្មភាពនៃចុះសួរសុខទុក្ខនេះ របស់រដ្ឋបាលស្រុក នាពេលនេះ បានបង្ហាញយ៉ាងច្បាស់ពីការយកចិត្តទុកដាក់ខ្ពស់ និងការដឹងគុណចំពោះវីរភាព និងការលះបង់របស់បងប្អូនអតីតយុទ្ធជន និងនិវត្តជនកម្ពុជា ដែលបានបម្រើជាតិមាតុភូមិនាពេលកន្លងមក៕