​តាកែវ៖ នៅព្រឹកថ្ងៃចន្ទ ៦កើត ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២០ ខែកក្កដា ឆ្នាំ២០២៦ ថ្នាក់ដឹកនាំរដ្ឋបាលស្រុកទ្រាំង បានអញ្ជើញចុះសួរសុខទុក្ខ និងនាំយកថវិកាបេឡាមរណៈសង្គ្រោះ ព្រមទាំងសម្ភារៈប្រើប្រាស់ ទៅប្រគល់ជូនគ្រួសារសពសមាជិកសមាគមអតីតយុទ្ធជន និងនិវត្តជនកម្ពុជា ស្ថិតក្នុងឃុំអង្គខ្នុរ ស្រុកទ្រាំង ខេត្តតាកែវ។
​សកម្មភាពមនុស្សធម៌ដ៏ថ្លៃថ្លានេះ ដឹកនាំដោយ លោក អ៊ុំ ចំរើន អភិបាលនៃគណៈអភិបាលស្រុកទ្រាំង និងជាប្រធានសមាគមអតីតយុទ្ធជន និងនិវត្តជនកម្ពុជាស្រុកទ្រាំង រួមដំណើរដោយ លោក ព្រំ ឆាត អនុប្រធានសមាគម, លោក ស៊ុត ខឿន និងលោក ទេព ស៊ីនឿន អភិបាលរងស្រុក ព្រមទាំងសហការី និងអាជ្ញាធរមូលដ្ឋាន។
​គ្រួសារសពដែលទទួលបានការគិតគូរ និងឧបត្ថម្ភនៅពេលនេះ គឺក្រុមគ្រួសារសពលោក ម៉ម ហ៊ុន (ភេទប្រុស ប្រភេទពិការ) ដែលបានទទួលមរណភាព កាលពីពេលថ្មីៗនេះ ដោយរូបលោកមានទីលំនៅរស់នៅភូមិគ ឃុំអង្គខ្នុរ ស្រុកទ្រាំង ខេត្តតាកែវ។
​នៅក្នុងឱកាសនោះ លោកអភិបាលស្រុក និងសហការី បាននាំយកនូវថវិកាបេឡាមរណៈសង្គ្រោះ ដែលជាថវិកាឧបត្ថម្ភដ៏ខ្ង់ខ្ពស់របស់ សម្តេចតេជោ ហ៊ុន សែន ចំនួន ៤,០០០,០០០ រៀល (បួនលានរៀលគត់) ព្រមទាំងសម្ភារៈប្រើប្រាស់ និងគ្រឿងឧបភោគបរិភោគមួយចំនួនទៀត ទៅប្រគល់ជូនក្រុមគ្រួសារសព ដើម្បីជួយសម្រាលបន្ទុក និងចាត់ចែងក្នុងពិធីបុណ្យសពទៅតាមប្រពៃណី។
​មានប្រសាសន៍ទៅកាន់ក្រុមគ្រួសារសព គណៈប្រតិភូរដ្ឋបាលស្រុកទ្រាំង បានសម្តែងនូវការសោកស្តាយ និងចូលរួមរំលែកទុក្ខយ៉ាងក្រៀមក្រំបំផុត ចំពោះការបាត់បង់សមាជិកគ្រួសារ ដែលជាអតីតយុទ្ធជនមានគុណបំណាច់ចំពោះជាតិមាតុភូមិ។ ជាមួយគ្នានោះ ក្រុមគ្រួសារសពក៏បានថ្លែងអំណរគុណយ៉ាងជ្រាលជ្រៅចំពោះ សម្តេចតេជោ ហ៊ុន សែន ក៏ដូចជាថ្នាក់ដឹកនាំស្រុកទ្រាំង ដែលជានិច្ចកាលតែងតែយកចិត្តទុកដាក់ មិនបោះបង់ និងតែងតែជួយសង្គ្រោះដល់បងប្អូនអតីតយុទ្ធជន និងនិវត្តជនគ្រប់ពេលវេលា៕